Azərbaycan Memarlıq və İnşaat Universiteti haqqında qısa məlumat
Azərbaycan Memarlıq və İnşaat Universiteti ölkəmizin ali təhsil müəssisələri arasında öz yeri və nüfuzu olan, zəngin təhsil ənənələrinə, güclü intellektual və kadr potensialına malik təhsil ocağıdır. Əsası 1975-ci ildə ulu öndər Heydər Əliyev tərəfindən qoyulan universitetdə tədris azərbaycan, rus və ingilis dillərində aparılır. Professor-müəllim heyəti 595 nəfər təşkil edir. 8 fakültədə bakalavr səviyyəsində 25, magistr səviyyəsində 26 ixtisas üzrə 10000-ə yaxın tələbə təhsil alır. Dünyanın 14 ölkəsindən 700-ə yaxın əcnəbi tələbəsi var. Universitetin nəzdində İnşaat Kolleci və Fizika-riyaziyyat təmayüllü Lisey, eyni zamanda 2010-cu ildən Layihə İnstitutu fəaliyyət göstərir. Ümumi sahəsi 49000m2 olan 4 tədris korpusu, tələbə şəhərciyi və idman kompleksi var.
Azərbaycan Memarlıq və İnşaat Universiteti (AzMİU) 1920-ci ildən Bakı Politexnik İnstitutunun tərkibində İnşaat fakültəsi, 1930–1934-cü illərdə müstəqil İnşaat və Memarlıq İnstitutu, 1934-cü ildən Azərbaycan Sənaye İnstitutunun, 1951-ci ildən isə Azərbaycan Politexnik İnstitutunun tərkibində inşaat-memarlıq yönümlü ixtisasları birləşdirən bir neçə fakültə kimi fəaliyyət göstərmişdir. 1975-ci ildə Azərbaycan Respublikası Nazirlər Kabinetinin qərarı ilə Azərbaycan İnşaat Mühəndisləri İnstitutu yaradılmışdır.
Azərbaycan Respublikası Nazirlər Kabinetinin 1992-ci il tarixli qərarı ilə Azərbaycan İnşaat və Mühəndisləri İnstitutu Azərbaycan İnşaat və Mühəndisləri Universitetinə çevrilmişdir.
Memarlıq elmləri doktoru, professor Gülçöhrə Hüseyn qızı Məmmədova Azərbaycan Respublikası Prezidentinin 14 yanvar 2000-ci il tarixli Sərancamı ilə İnşaat və Mühəndisləri Universitetinin rektoru təyin edilmişdir.
Azərbaycan Respublikası Prezidentinin 13 iyun 2000-ci il tarixli Fərmanı ilə Azərbaycan İnşaat və Mühəndisləri Universiteti Azərbaycan Memarlıq və İnşaat Universiteti adlandırılmışdır.
Professor Gülçöhrə Hüseyn qızı Məmmədova II çağırış (2000-2005) və IV çağırış (2010-2015) Azərbaycan Respublikası Milli Məclisinin deputatı seçilib, 2006-cı ildə Əməkdar memar fəxri adı verilib, 2009-cu ildə Fransanın “Akademik Palma Kavaleri” ordeninə layiq görülüb, 2012-ci ildə “Akademik Mikayıl Useynov” xatirə medalı ilə təltif olunub, 2013-cü ildə Azərbaycan Respublikasının ictimai-siyasi həyatında fəal iştirakına görə “Şöhrət” ordeni ilə təltif olunub, 2016-cı ildə Azərbaycanda təhsilin inkişafındakı xidmətlərinə görə “Azərbaycan Respublikası Prezidentinin fəxri diplomu”na layiq görülüb, 2019-cu ildə Azərbaycan Respublikasının Prezidentinin Sərəncamı ilə “Azərbaycan Xalq Cümhuriyyətinin 100 illiyi (1918-2018)” yubiley medalı ilə təltif edilib.